Gin-imbitar sang Senate Blue Ribbon Subcommittee si former President Rodrigo Duterte sa una sini nga hearing sa Philippine War on Illegal Drugs sa Lunes, Oktubre 28.
Sa sulat nga ginpadala sa presidente, ginhingyo ni Senator Koko Pimentel nga Chair sang Subcommittee kay Duterte nga magpasa on or before October 25 sang iya sworn statement ukon affidavit nga nagadetalye sang iya ihibalo kag posible partisipasyon sa amo nga drug war.
Suno kay Pimentel, ang Blue Ribbon nagaimbestigar sa mga sala kag kapaslawan sang mga government officers kag employees kag ang inquiry magasentro lang sa War on Drugs sa idalom sang Duterte kag sang subong nga administrasyon.
Magluwas kay Duterte, ginapaabot man nga magtambong sa hearing amo sanday Senators Ronald Dela Rosa kag Bong Go nga naangot sa illegal activities sa idalom sang War on Drugs.
Ginalauman man nga magtambong si former Senator Leila De Lima.
Ginpasiguro naman ni Senate President Francis Escudero nga mangin patas ang hearing bisan pa nga involved diri ang kaangay nila nga mga senador.
Suno kay Escudero, ang attendance sang isa ka president ukon former president sa isa ka legislative inquiry ang indi na makakilibot bangud nahimo naman ini sadto ni anay Presidente Benigno Aquino III kaangot sa issue sang SAF 44.
Dugang niya, ang hearing mangin tsansa sa isa ka tawo agud depensahan ang kaugalingon kag atubangon ang mga nagaakusar sa iya bilang kabahin sang due process.
