ILOILO CITY – Nagduso sang hagna si Senator Jinggoy Estrada nga naga-isol sang barangay and Sangguninang Kabataan (SK) elections humalin sa December 5, 2022 kag patigayunon ini sa una nga Lunes sang December 2023.
Sa amo nga hagna, ang mga magadaog nga barangay kag SK officials ang magasugod sang ila pagpungko sa January 1, 2014.
Suno kay Estrada, ang P8-billion nga budget para sa eleksyon ang mahimo pa nga magamit bilang pondo sa economic programs kag health services agud nga mahagan-hagan ang epekto sang pandemya sa Pilipino, particular na sa mga tuman nga na-apektuhan.
Dugang pa niya, mahimo man ini nga gastuhon anay ilabi na subong nga may yara naman sang bag-o nga surge sang COVID-19.
Ang barangay kag SK elections ang makahulat man suno sa senador.
Sa explanatory note, ang 2022 national and local elections ang nagtuga sang tuman nga kumplikto sa electorate.
Magluwas kay Estrada, nagduso man sang kapareho nga hagna si Senator Francis “Chiz” Escudero.
Matandaan nga sang Lunes, nagpanawagan si Commission on Elections (Comelec) acting spokesperson Rex Laudiangco sa kongreso nga magdesisyon na angut sa amo nga butang agud nga makahanda man ang poll body.
Apang suno kay presumptive Senate President Juan Miguel Zubiri, magahulat ang senado sa pinakauna nga State of the Nation Address (SONA) ni President Ferdinand “Bongbong” Marcos Jr. antes magdesisyon kun bala magapasar ini sang hagna nga nagapaiway sang barangay elections ukon indi.
