ILOILO CITY – Gin-athag ni Senate Secretary Renato Bantug Jr. nga wala sang P331 million confidential funds ang Senado para sa 2023.
Ini ang sabat ni Bantug sa mga social media post nga suno sa iya, patalang lamang kag himu-himo sang pila ka mga personalidad nga may tinutuyo nga gub-on ang reputasyon sang institution nga sa subong, naga-usisa sa nature sang confidential kag intelligence funds kag sang government agencies nga nagakaangay nga makabaton sini.
Suno sa iya, base sa Maintenance and Other Operating Expenses sang Senado subong nga tuig, ang object sang expenditure nga ‘Confidential, Intelligence and Extraordinary Expenses’ ang may tatlo ka items nga amo ang Confidential Funds, Intelligence Funds kag Extraordinary and Miscellaneous Expenses.
Pahayag niya, sa 2023, ang ‘Extraordinary and Miscellaneous Expenses’ lamang ang may line item nga nagabalor sang P331.9 million kag wala sang line items para sa ‘Confidential Funds’ ukon sa ‘Intelligence Funds.’
Dugang pa niya, ang P331.9 million ang gingamit para sa mga meetings, seminars, conferences, public relations, education kag iban pa nga aktibidad para sa chamber.
Apisar nga ginpanginwala niya nga wala sang confidential funds subong nga tuig, ginbuyagyag niya nga sang nagligad nga mga tuig, may yara sang confidential funds ang upper chamber apang wala ini nagamit kag ginbalik sang bilog sa National Treasury.
Ginpahayag man niya nga hugot ang pagpati ni Senate President Juan Miguel Zubiri nga indi kinahanglan sang Senado ang confidential funds.
Ginkumpirma man niya nga wala man sang confidential fund sa masunod nga tuig.
Wala na gintumod ni Bantug kun kay sin-o alegasyon ang iya ginsabat apang antes sini, ginkwestiyon ni former Palace spokesperson Atty Harry Roque ang confidential funds sang pila ka mga opisyal lakip na ang P331.9 million nga gina-alegar iya sang Senate President.
