Wala pa sang kumpirmasyon gikan kay Senator Panfilo Lacson kun daw ano ka matuod nga nakabaton na siya sang bakuna batok sa COVID-19 apisar wala pa sang gin-aprubahan ang Philippine Health officials nga anuman nga brand sang immunization batok sa nasambit global pandemic.
Ginkadlawan lang sang senador ang pamangkot kun bala nangin kabahin man siya sang clinical trial para sa bakuna.
Matandaan nga si Senate President Vicente Sotto III ang una nagpahayag sa publiko nga sanday Lacson kag House Majority Leader Martin Romualdez ang nakabaton na sang COVID-19 vaccine.
Wala ginkumpirma kag wala man ginpanginwala ni Lacson ang nasambit nga pahayag, samtang ginahulat pa subong ang sabat ni Romualdez.
Una na nagpaandam ang Department of Health sa publiko nga maghalong sa pagbaton sang COVID-19 vaccines bangud tubtob subong, wala pa sang bulong nga naaprubahan ang Food and Drug Administration batok sa nasambit nga balatian.
