Pila ka adlaw antes niya ipasa ang korona sa bag-o nga Miss Universe, ginhatagan sang kaathagan ni reigning Miss Universe Sheynnis Palacios sang Nicaragua, nga welcome ini gihapon nga magbalik sa iya pungsod kag wala ini gin-exile.
Sa isa ka interview, ginsiling ni Palacios nga ang iya Masako nga schedule bilang Miss Universe amo ang nagapugong sa iya nga magpauli kun sa diin nagbisita ini sa 31 ka mga pungsod sang 2023, nga gin- organize sang Miss Universe Organization (MUO).
Suno kay Sheynnis, nahidlaw na gid ini nga magpauli kag wala man siya ginadumilian nga magbalik sa Nicaragua.
Baliskad ini sa post sang bulan sang Mayo ni Anne Jakrajutatip, co-owner sang MUO, nga yara sa indefinite exile si Palacios.
Ang post ang gilayon man nga ginpanas.
Patigayunon ang coronation night sang Miss Universe sa Nov. 16 (Nov. 17 Manila time), kun sa diin isa ang pambato sang Pilipinas nga si Chelsea Manalo ang nagahandom nga mangin successor sang Nicaraguan beauty queen sa 73rd Miss Universe Competition sa Mexico.
