Ginpahanumdom sang Simbahan nga indi lamang option kundi isa ka responsibilidad para sa Kristyano ang pagbulig sa mga isigkatawo nga imol.
Ini ang kabahin sang sermon ni Msgr. Meliton Oso, Director sang Jaro Archdiocesan Social Action Center, subong nga 33rd Sunday in Ordinary Time kun sa diin gina-obserbar sang Simbahan ang World Day of the Poor.
Suno kay Msgr. Oso, dapat nga himuon nga kultura kag lifestyle ukon kinaandan nga pagginawi ang pagpalab-ot sang bulig sa mga pigado.
“Charity to the poor is not optional, but mandated by Christian discipleship. Buot silingon, kun Kristyano ka, you cannot but give to the poor. You cannot but be concerned about the situation of the poor,” dugang sini.
Ginmensyonar man sang JASAC director nga halimbawa ang kinaandan nga paggawi sang publiko nga nagaguwa lamang ang pagkamaalwan kun naga-abot na ang Paskwa sa kada Disyembre.
Pahayag ni Msgr. Oso, bisan nga may Christmas bonus man kag 13th month pay ukon wala, dapat dumdom nga mandatory sa idalom sang Christian discipleship ang charity ukon paghatag sang bulig sa mga imol.
“Mga utod, maalwan abi kita kun December lang. Enero tubtub Nobyembre, bagit naman kita, wala kita labot sa ila, correct? Wala o may ara nga 13th month pay kag bonus, brother disciple of Jesus, obligasyon naton nga mag-extend sang aton kabalaka sa imol, because again, it is mandatory and not seasonal,” suno pa sa iya nga sermon.
Nahibaluan nga sa rekord sang Poverty, Prosperity, and Planet Report 2026 sang World Bank Group, ginabanta nga 811 million ka mga tawo sa kalibutan ang nagapuyo sa extreme poverty ukon tuman nga kaimulon.
Suno naman sa full-year 2025 poverty report sang Philippine Statistics Authority (PSA), 11.08 million ka mga Pilipino ang nagapuyo nga mas manubo sa poverty threshold nga naga-representar sang record-low population poverty incidence nga 9.7 percent.
Kun balikan, na-establisar ang World Day of the Poor paagi kay Pope Francis sang 2017 sa pagtakop sang Jubilee of Mercy.#









