Kumpleto sa gihapon ang Simbang Gabi sang Filipino Community sa Israel apisar sang mga restrictions dala sang COVID-19 pandemic.
Christmas tree is lit outside the Church of the Nativity, traditionally believed by Christians to be the birthplace of Jesus Christ in the West Bank city of Bethlehem, Saturday, Dec. 5, 2020. (AP Photo/Majdi Mohammed)
Suno kay Bombo International Correspondent Archie Enriquez, tumandok sang Maasin, Iloilo kag subong nagatinir sa Jerusalem nga amo ang capital sang Israel, iya ginpahayag nga apisar limitado ang ila nga hulag, wala gid ginpaiway ang pagpatigayon sang mga misa bilang kabahin man sang pagselebrar sang Paskwa.
Espesyal ang Paskwa sa Israel bangud may yara ini sang historic kag religious significance bilang lugar kun sa diin gid natabo ang Christmas story.
Sang Disyembre 13, may Christmas party man ang mga Pinoy sa amo nga lugar.
Para sa ila midnight mass ukon pagsalubong sang kaadlawan ni Jesus, gindayon ang misa suno kay Enriquez apang duha ka lugar ang ginpatigayunan bangud indi sila pwede magtingob sa isa ka simbahan.
Bisan malamig sa gwa sang simbahan suno kay Enriquez, ginaagwanta lang nila agud masunod gid ang mga protocol batok sa COVID-19.
Sang wala pa ang pandemya, ginadagsa sang mga tawo pati na sang mga Pinoy ang town of Bethlehem nga yara sa south sang Jerusalem nga amo man ang birthplace ukon natawhan ni Jesus.
Sa tunga sang coronavirus pandemic, kanselado ang December 25 nga misa sang Filipino community sa amo nga Palestinian town apang nagapasalamat gihapon sanday Enriquez bangud sadto suno sa iya, nabasa lang niya ini sa bibliya apang subong nakadtuan na nila ini kag naselebrar ang adlaw sang pagkatawo sang Manluluwas.
