ILOILO CITY – Nagapabilin sa gihapon nga normal ang sitwasyon sa Moscow, Russia apisar sang pamahog sang civil war matapos ang tuyo nga pagsalakay sang mercenary group nga Wagner sa capital state.
Sang nagligad nga semana, ginpahayag ni Russian mercenary chief Yevgeny Prigozhin, nga anay kaalyado ni President Vladimir Putin, nga nakontrol na nila ang Russian city nga Rostov-on-Don nga kabahin sang ila tinutuyo nga pahalinon ang military leadership.
Ini ang ginlaragway ni Putin nga isa ka akto sang pagpangtraidor sa pungsod.
Sang ulihi, nagmandu si Prigozhin sa iya mercenaries nga untaton na ang pagsulod sa Russian capital kag magbalik na sa ila field camps sa Ukraine.
Ini bangud nga indi niya gusto nga magdanak ang dugo sa Russia.
Suno kay Bombo Genevive Dignadice direkta sa Moscow, gindeklarar sang Moscow City government ang holiday agud nga wala sang rason ang mga tawo nga maggwa sa ila panimalay.
Ini ang posible nga maglawig pa sang isa ka semana.
Dugang pa niya, mas ginpahugot pa ang seguridad sa palibot sang syudad agud nga masiguro nga wala sang may makalusot nga myembro sang mercenary group.
Ang mga tawo nga yara sa gwa sang ila panimalay, kaangay sa mga transportation hubs, ang ginapangitaan sang dokumento.
Sa pila ka mga establishments kag sa mga transportation areas, may yara sang ginapatuman nga security measure kun sa diin, pagsulod mo pa lamang, ma-detect na kun may yara sang criminal record.
Ang ini nga mga security measures ang madugay na nga gina-implementar sa syudad.
