Nagpahayag si President Ferdinand Marcos Jr. nga dapat na kabalak-an ang pinakaulihi nga mga insidente sa West Philippine Sea apisar nga gina-demonstrar sini kun ano ka bakod ang mga Pinoy nga naga-atubang sang kaangay nga pagpang-harass.
Kabahin ini sang speech sang presidente kadungan sang 88th founding anniversary sang Armed Forces of the Philippines (AFP) sa Camp Crame sa Quezon City, Disyembre 21.
Kun matandaan, sang Disyembre 9 kag 10, sunod-sunod ang natabo nga water cannon incidents sa amo nga teritoryo kag naguba pa ang sakayan sang Pilipinas.
Nasaksihan ini mismo ni AFP chief General Romeo Brawner Jr. nga personal nga nag-upod sa resupply mission.
Sa pihak sini, ginpahayag ni Marcos nga ang amo nga insidente ang nagapakita man kun ano ka bakod ang mga Filipinos kag ang panindugan sini nga protektahan ang teritoryo sang pungsod.
“The recent incidents involving no less than our CSAFP is worrisome. But it is a proud demonstration of Filipino courage against coercion and our firm resolve to protect preserve and uphold our territorial integrity,” suno kay Marcos.
Gindayaw man sang AFP Commander-in-Chief ang militar bangud sang responsable sini nga aktwasyon sa pag-resolba sang isyu sa rehiyon kag pagsunod gid sa layi.
“The AFP must continue to improve its readiness to effectively prevent and to respond properly to the current and emerging threats,” pahayag pa sini.
Ginhingyo man sang presidente sa militar nga pabaskugon pa ang alyansa sini kag partnership sa ila nga counterparts sa iban nga mga pungsod.
“This administration remains committed to supporting initiatives that will bolster our AFP’s external defense capabilities. It is my hope that you and the rest of the military force will continue to uphold the AFP’s core values of honesty, service and patriotism in every endeavor,” kabahin gihapon sang speech sini sa atubang sang tropa sang militar.#
