Nag-file na sang reklamo nga physical injuries si SK Kagawad Lorence Galvez batok kay Punong Barangay Gemma Calzado, ini matapos ang natabo nga paglampos sang salsalon nga uluyatan sang silhig sang Punong Barangay sa SK kagawad kagab-i, Abril 6.
Sa interview sang Bombo Radyo kay Pcapt. Ryan Christ Inot, hepe sang Iloilo City Police Station 4, iya ginpahayag nga nadala lamang sa emosyon si Punong Barangay Calzado kag wala sini magustuhan ang sabat sang SK Kagawad sa iya rason nga nahimo sini ang pagpanglampos.
Suno pa kay Pcapt. Inot nga antes sang insidente, nagpost sa social media si Galvez sang gina-alegar pagpabati-bati sa Punong barangay kaangay sang mga malain nga tinaga rason nga nagdugang pa ini sang tensyon sa tunga sang duha.
Suno pa sa iya nga sang tion sang insidente gilayon nga nagresponde ang mga kapulisan sa lugar kag nahatagan gilayon sang bulig ang biktima, lakip na ang pagpadala sini sa ospital agud madapatan sang pagbulong.
Sa karon, yara na sa kustodiya sang kapulisan si Calzado samtang ginahulat ang pormal nga pagpasaka sang kaso sa iya sang SK Kagawad.
