ILOILO CITY – Indi na mag-request ang Iloilo City Police Office (ICPO) sang bulig sang Scene of the Crime Operation (SOCO) kaangot sa kaso sang lalaki nga ginlamon sang meat mixer sang frozen food sa Barangay Mansaya, Lapuz, Iloilo City.
Sa interview sang Bombo Radyo kay ICPO Director Police Colonel Martin Defensor Jr., iya ginpahayag nga nagwa sa imbestigasyon sang La Paz Police Station nga wala sang foul play sa insidente.
Tungod sini suno kay Defensor, makabig nga case closed na ang insidente.
Apang suno kay Defensor, nagakadapat nga kabigon nga persons of interest ang tanan nga mga tawo nga yara sa lugar sang matabo ang insidente.
Samtang, nagpanugyan man si Defensor nga sa tion nga may kaangay nga hitabo, nagakadapat nga i-cordon ang lugar; kuhaan sang picture ang biktima, kag pangayuan sang statement ang mga tawo sa lugar.
