Pahalugan ang mga pagsulundan sa siyam ka mga prefectures sa Japan lakip na sa Tokyo samtang nagahilapit ang Tokyo Olympics apang may pila gihapon ka pagpanghugot nga dapat ipabilin agud nga malikawan ang surge sang COVID-19 cases.
Nagpangabay si Prime Minister Yoshihide Suga sa publiko nga maglantaw na lang sang Olympics sa TV agud malikawan nga maglapta ang virus.
Una na nga ginpahayag ni Suga nga i-lift na ang state of emergency sa siyam ka areas apang ipabilin ang “quasi-emergency” measures sa pito sa sini nga mga lugar lakip na sa Tokyo tubtob sa Hulyo 11.
Suno kay Bombo International Correspondent Josel Palma direkta sa Japan, nagpaandam man subong ang Japanese medical experts nga ang pag-patigayon sang Olympics sa tunga sang COVID-19 pandemic ang may daku nga posibilidad nga makapasaka sang infections.
Ang ginapahayag least risky nga opsyon amo nga dumilian ang spectators halin sa luwas sang pungsod nga makalantaw sang personal sa hampang, apang ginatun-an pa subong kun ano ang mangin pagsulundan sa fans halin mismo sa Japan.
Sa Lunes, magadesisyon na sang pinal ang Tokyo 2020 organizers, International Olympic Committee, kag mga tiglawas halin sa national kag Tokyo governments kun ano ang mangin pagsulundan para sa fans halin sa Japan nga luyag maglantaw sang personal sa mga hampang.
