Nagdeklara na sang state of calamity ang pila ka mga banwa sa Sarangani lakip na ang Malapatan kag Glan matapos ang halit nga gintuga sang magnitude 7.8 nga linog sa lugar.
Base sa datos sang Philippine Institute of Volcanology and Seismology (PHIVOLCS), nakaeksperyensya ang Malapatan sang Intensity VIII, nga isa sa pinakamabaskog nga narekord sa amo nga linog.
Bangud sang daku nga halit, temporaryo nga ginsirado anay ang Masla Bridge matapos makitaan sang gamay nga pagkaguba sang istruktura.
Sa pihak nga bahin, sa banwa sang Glan, may ara sang landslide nga nagluntad kag may ara naman sang salakyan nga natampukan sang nagkalahulog nga mga bato.
May mga residente naman nga gilayon nga nagakinahanglan sang bulig kaangay sang pagkaon, tubig, kag iban pa nga suplay.
Napaidalom naman sa state of calamity ang General Santos City kag pila ka bahin sang GenSan–T’boli–Surallah Road kun sa diin temporaryo anay ini nga ginsara matapos makit-an sang Department of Public Works and Highways nga indi ini luwas agyan sang mga motorista.
