GUIMARAS – Ginpamatud-an sang isa ka iloy nga indi upang ang edad kag kapigaduhon agud makatapos sa pagtuon sa kolehiyo.
Ini amo si Lourly Simeros, 32, residente sang Barangay Gaban, San Lorenzo, Guimaras.
Si Simeros ang may duha na ka mga kabataan nga naga-edad sang 10 kag walo ka tuig.
Sa interview sang Bombo Radyo kay Simeros, iya ginpahayag nga bangud sa pigado nga kabuhi, naatrasar ang iya pag-eskwela sa diin naka-angkon na ini sang pamilya.
Suno kay Simeros, tuig 2010, nag-eskwela siya sa kolehiyo, apang wala siya makatapos bangud wala sang inugasto sa pagtuon tubtob nga nakapamana ini kag naka-angkon sang kabataan.
Apang sang tuig 2020, nagbalik ini sa kolehiyo kag nag-eskwela sang Bachelor of Industrial Technology Major in Fashion and Apparel Technology sa Iloilo Science and Technology University.
Wala naman nagalaom si Simeros nga makatapos bilang Magna Cum Laude bangud ang handom lang sini kuntani amo nga makatapos sa kolehiyo kag makapangita sang maayo nga trabaho.
Tuman naman ang pagpasalamat sini sa Diyos kag sa iya pamilya nga nangin salandigan niya sa pagtilaw nga iya naagyan sa kabuhi.
Sa subong, plano ni Simeros nga makatrabaho kag sa tion nga makasupot, makuha ini sang Education agud matuman ang iya handom nga mangin manunudlo.
