Nahimo nga kaladlawan ang ginhimo sang isa ka lalaki nga nagapanago sa pulis apang madasig man nga nadakpan bangud sa iya ginasuksok nga vest nga may yara sang reflector!
Natabo ini sa Texas, USA kun sa diin gin-post pa sang Aransas Pass Police Department ang video kun sa diin makit-an ang lalaki nga todo-hapa kag panago sa kasiutan apang madasig man nga nakit-an sa drone video bangud sa iya nagabanaag nga orange jacket.
Suno sa pulis, ang amo nga lalaki amo ang suspek sa carnapping incident.
Ginpahayag nga sang ginlagas siya sang mga pulis, ginbilin niya ang iya ginkawat nga salakyan kag nagpaspas sa pagdalagan padulong sa lugar kun sa diin masiot kag mataas ang mga tanum.
Makit-an sa video nga easy-peasy lang ang pagpangita sa lokasyon sang amo nga lalaki bangud bisan nagahapa siya, wala siya sang ideya nga kit-anon siya sa drone kag agaw atensyon ang reflector sa iya vest.
Wala na ini sang nahimo sang ginpalapitan sang pulis kag gin-aresto.
Daw nagapangsunlog naman ang post sang police department sang ila ginsapubliko ang video. Suno diri: “Might be wise not to dress like a road crew worker while running from the police in a stolen car and then trying to hide in heavy brush.” #
