ILOILO CITY – Ginpasakaan na sang kaso nga murder ang nagpatay sa masahista sa sulod sang hulot sa Queen’s Court Inn sa Barangay Bolilao, Mandurriao, Iloilo City.
Ang biktima amo si Christine Gabayeron, 38, temporaryo nga nagatinir sa syudad sang Iloilo apang residente sang Barangay Bacjawan Sur, Concepcion, Iloilo.
Ang suspek naman amo si Rommel John Celestre y Escasa, alyas “Dikit”, residente sang Barangay Balabago, Jaro, Iloilo City, ginabanta nga naga-edad sang 21-22 anyos.
Kun balik-balikan, boluntaryo nga nagsungka sa kapulisan si Celestre kag nag-ako sa ginhimo nga krimen.
Sa interview sang Bombo Radyo kay Police Lieutenant Colonel Albert Sy, station commander sang Mandurriao Police Station, iya ginpahayag nga wala nag-intindihanay ang biktima kag suspek sa baydanay sa pagpa-masahe.
Suno kay Sy, tatlo ka botelya sang makahulubog nga ilimnon ang narekober sang kapulisan kag amo ang gin-gamit sang suspek sa pagpatay sa biktima.
Base naman sa autopsy result, patal nga pilas sa ulo ang gintunaan sang kamatayon sang biktima.
Nahibaluan nga ang kaso nga murder nga ginpasaka sa suspek ang wala sang pyansa.
