Gina-imbestigaran sang mga otoridad ang impormasyon nga konektado sa online group nga may kaangtanan sa mga krimen ang menor de edad nga estudyante nga suspek sa pagpangluthang sa sulod sang eskwelahan sa Banga, South Cotabato.
Sa nasambit nga pagpangluthang yara sa tatlo ka estudyante nga ginbawian gid sang kabuhi kag walo naman ang nasamaran.
Suspek sa insidente amo ang 16-anyos nga Grade 9 student nga ginluthang man ang kaugalingon matapos ang insidente.
Sa interview sang Bombo Radyo kay Banga Mayor Albert “Boyet” Palencia, iya ginpahayag nga base sa una nga imbestigasyon sang mga kapulisan, myembro ang suspek sang isa ka online “true crime” community ukon online fandom nga interesado sa mga kriminalidad, ilabi na sa mga high-profile serial and mass killings.
Ginalantaw man ang pila ka mga social media post sang suspek kun sa diin may ara na ini sang mga pagpamahog nga may pagahimuon sya nga pagpangluthang.
Sandig sa imbestigasyon, nagpaandam pa ini sa iya classmates pinaagi sa ila group chat nga magpauli pagkatapos sang ila panyaga bangud may ara sang malain nga matabo.
Matapos ang ila nga pagpanyaga, ginabanta ala una tubtub alas dos sa hapon, didto na kag natabo ang trahedya sa Banga National High School.
