Nabuyagyag nga indi lamang opisina kag dormitoryo ang yara sa sulod sang gin-raid sang otoridad nga Philippine Offshore Gaming Operators (POGO) hub sa Bamban, Tarlac kundi may yara man sang olympic-sized swimming pool, pila ka tunnels, kag luxury cars.
Ini nga napulo ka ektarya nga Zun Yuan Technology complex ang ginsulod sang Presidential Anti-Organized Crime Commission, Philippine National Police kag Armed Forces of the Philippines sang nagligad lamang nga Myerkules, Marso 13.
May yara man sang villas nga ginapatihan nga ginagamit para sa high-ranking officials kag VIPs.
Magluwas sa alegasyon nga nagapadalagan sang scam ang amo nga complex kag may isyu man sa human trafficking kag illegal detention, nagapati ang otoridad nga madamo pa nga sikreto ang ginatago sa amo nga compound ilabi na bangud sa nakit-an nga tunnels.
Posible suno sa Presidential Anti-Organized Crime Commission nga gintukod ang underground tunnels agud mahapos nga maka-eskapo ang mga suspek.
Sa sulod sang villas, may malahalon nga mga furniture kag appliances, may safety vaults sa mga hulot, kag sa guwa naman naka-park ang pila ka SUVs kag luxury cars.
Sandig pa sa na-report sang otoridad, ini nga daku nga compound ang nahamtang sa ingod gid lamang sang municipal hall sang Bamban.
Sa amo nga operasyon sang Marso 13, 373 ka mga Pinoy ang na-rescue apang ginpang-release na sang Huwebes sang gab-i matapos napamatud-an nga wala sang koneksyon sa iligal nga buluhaton. Ang siyam naman ka iban nga Pinoy ang makabig nga testigo sa mga pagpang-abuso nga nahimo sa amo nga compound.
Napasaka naman ang kaso-kriminal batok sa walo ka Chinese nationals nga naaresto sang amo man nga adlaw.
Antes ang raid sang Marso 13, gin-raid man amo nga area sang Pebrero bangud sa alegasyon sang cryptocurrency scam sang napaidalom ang lisensya sini sa Hongsheng Gaming technology.#
