ILOILO CITY – Wala pa gihapon sang naga-ako kun sin-o ang tag-iya sang tatlo ka inugbulang nga manok nga ginbutang sa bike lane sa ginsang-an sang Calubihan Jaro, Iloilo City kag Dungon A, Jaro, Iloilo City.
Sa interview sang Bombo Radyo kay Punong Barangay Marieta Orleans sang Barangay Cuartero Jaro, Iloilo City, iya ginpahayag nga indi iya pumuluyo ang nagbutang sang manok sa amo nga lugar.
Suno kay Orleans, ginlibot na sang mga barangay officials ang ila nga barangay kag ginwalihan na ang mga pumuluyo kag sila mismo ang nakahangop nga indi bulutangan sang manok ang bike lane bangud makasabad ini sa dalan kag mahimo pa mangin rason sang aksidente.
Nagapati si Orleans nga taga-Calubihan, Jaro, Iloilo City, ang tag-iya sang mga manok.
Ginlab-ot man sang Bombo News Team si Punong Barangay Rodney Guintibano sang Barangay Calubihan, Jaro, Iloilo City,
Sa interview sang Bombo Radyo kay Guintibano, iya ginpahayag nga lunsay Jolo ang manok sa Calubihan kag wala sang manok ang mga pumuluyo nga inugbulang.
Suno pa kay Guintabano, kagab-i pa niya nakita ang social media post may kaangtanan sa manok nga nakasulod pa sa kurong kag nahamtang sa bike lane.
Ginalibot pa subong ni Guintabano ang ila nga lugar agud magpulupamangkot sa mga pumuluyo.
Nagpasalig man ang natungdan nga doble na ang ila warning sa mga salawayon nga mga pumuluyo.
Gin-ako ni Guintibano nga may ara gid pasaway nga mga tawo kag may nakaagi man bulad sang humay sa bike lang apang ginpaandaman naman sang mga barangay officials.
Suno naman kay Mr. Jeck Conlu, pinuno sang Public Safety and Transportation Management Office, bisan magtudluanay pa ang mga barangay officials, wala gid ginatolerar ini nga akto.
Nagapanawagan si Conlu sa mga opisyal nga buligan ang Iloilo City Government nga kuhaon ang tanan nga obstruction sa bike lane — manok man ukon indi.
Kun maaktuhan sang Public Safety and Transportation Management Office ang ginabutang nga manok sa bike lane, wala sang may makalusot kag kumpiskaron gid ini sang otoridad.
