Ginsuguran na sang Philippine Air Force (PAF) kag Republic of Korea Air Force (RKAF) ang tatlo ka adlaw nga “Black Eagles Airshow and Friendship Flight” sa Clark Air Base sa Mabalacat City, Pampanga.
Sa pag-umpisa sang airshow, may yara sang special friendship flight kun sa diin ginpabugal ang apat ka FA-50PH light fighters nga ginpalupad sang mga PAF pilots.
Kaupod man sini ang T-50B aircraft demonstrators nga ginpalupad naman sang mga piloto halin sa 53rd Air Demonstration Group ukon ang Black Eagles nga amo ang flight display team sang South Korea.
Nahibaluan nga sa subong, may 12 ka FA-50PH aircraft nga gina-operate ang air force sang Pilipinas paagi sa purchase contract nga napirmahan sang 2014 kaupod sa Korea Aerospace Industries.
Ini nga mga aircraft ang makabig nga “game changer” bangud sa daku nga kontribusyon sang natabo ang Marawi Siege sang 2017.
Ang T-50Bs nga gingamit sang aerobatic team sang South Korea amo ang trainer jet versions sang amo nga sahi sang aircraft.
Suno kay Department of National Defense Secretary Gilberto Teodoro Jr., ini nga airshow ang ginpatigayon bilang komemorasyon sang ika- 75 nga anibersaryo sang diplomatic ties sa tunga sang duha ka nasyon.
Bilang sabat, gin-abi-abi man ni Maj. Gen. Park Chang-kyu, commander sang Air Defense and Control Command sang Republic of Korea Air Force, ang masobra pito ka dekada nga pag-abyanay sang Pilipinas kag South Korea.
Magalawig ang airshow tubtub buwas, Marso 5, bukas sa publiko, kag maga-feature man sang exhibit sang nagkalain-lain nga Korean defense companies.#
