ILOILO CITY- Naggwa sa autopsy sa lawas sa tatlo ka mga myembro sang Pamilya Jetano nga napatay sa sunog sa Salvacion Habog-habog, Molo, Iloilo City nga asphyxia bangud sa paghaklo sang tuman ka damo nga aso ang kabangdanan sang ila kamatayon.
Ang tatlo nga napatay ang gin-identify sang pamilya nga amo sanday Elizabeth Jetano, 65-anyos nga stroke patient; anak sini nga si Niel Jetano, 27; kag anak ni Niel nga si Rain Gabriel, 10.
Sa interview sang Bombo Radyo kay Fire Supt. Melanie Habawel, Iloilo City Fire Marshal, iya ginpahayag nga sang nasapwan ang mga biktima, duha sa ila ang nagakaya nga patimaan nga nakabugtaw pa ang mga ini.
Suno kay Habawel, isa man sa ginalantaw nga anggulo kun ngaa wala nakagwa sa balay ang mga biktima amo ang posibilidad nga nakakandado ang ila pwertahan apang nabudlayan ang otoridad nga makumpirma ini bangud nga totally burned man ang pwertahan.
Dugang ni Habawel, sa subong, indi pa man mapat-ud kun intentional ukon accidental ang natabo nga sunog.
