ILOILO CITY – Ginkumpirma sang Department of Health ang tatlo ka panibag-o nga kaso sang Coronavirus Disease 2019 (COVID-19) sa Western Visayas.
Una diri amo si Patient #14, 28 anyos nga babayi gikan sa Bacolod City kag may travel history sa Estados Unidos.
Ika duha amo si Patient #15, 41 anyos nga babayi gikan sa Negros Occidental, may travel history sa Metro Manila kag Davao City, Hypertensive, asthmatic, kag yara na sa estable nga kondisyon sa isa ka hospital.
Kag ang ika tatlo amo si Patient #16, 70 anyos nga lalaki gikan sa Iloilo, wala sang travel history sa lugar nga may kumpirmado nga kaso sang COVID-19, wala man sang exposure ukon close contact sa tawo nga positibo sa nasambit nga virus apang may yara sang chronic obstructive pulmonary disease kag diabetes.
Sa subong, may yara na sang 16 ka kaso sang COVID-19 sa Western Visayas samtang indi pa makumpirma sang Department of Health kun gikan sa ano nga banwa ang 70 anyos nga nagpositibo sa COVID-19 sa probinsya sang Iloilo.
Suno kay Dr. Mary Jane Juanico, pinuno sang Infectious Disease Section sang Department of Health 6, magasapol pa sila buwas agud istoryahan ang nasambit nga kaso.
