𝘈𝘯𝘨 𝘪𝘣𝘢𝘯 𝘯𝘨𝘢 𝘵𝘢𝘸𝘰 𝘯𝘨𝘢 𝘯𝘢𝘨𝘢𝘩𝘢𝘭𝘪𝘯, 𝘯𝘢𝘨𝘢𝘣𝘢𝘭𝘪𝘬 𝘮𝘢𝘯.
Ini man ang ginhimo sang tatlo ka teenagers nga napaidalom sa pagtatap sang Municipal Social Welfare Development (MSWD) sa Alfonso, Cavite kun sa diin inoras matapos nakapalagyo sa talatapan, mato-mato man sila nga nagbalik.
Suno sa hepe sang Alfonso Municipal Police Station nga si P/Major Raymond Balbuena, naga-edad sang 15,16, kag 17-anyos ang tatlo, lunsay mga lalaki, kag ginakabig nga Children in Conflict with the Law.
Lunsay man sila na-involve sa kaso nga carnapping nga natabo sang nagligad nga Marso 10 sa amo man nga banwa.
Sandig sa imbestigasyon sang pulis, nakakita ang kabataan sang buho sa building sang social welfare office kag didto sila nangita sang paagi agud nga makalusot kag makapalagyo halin sa Bahay Kalinga.
Nag-report naman sa pulis ang iloy sang isa sa mga bata nga ‘las tres y medya sa kaagahon sang may nagpanuktok sa ila nga balay. Amo na lang ang iya kakibot nga yara sa atubang sang puwertahan ang iya bata kag ang duha sini ka kaupdanan.
Wala sini ginpaathag sa iya iloy kun paano sila nakahalin sa pasilidad, apang ginkuha sini ang iya nga cellphone, nagkuha man sang P2,000 sa kahita sang iya nga iloy, kag naglakat man sila gilayon.
Pahayag naman sang hepe, posible nga may ginkadtuan lang ang tatlo ukon may ginlagawan. Sandig sa report, 12:00 sa kagab-ihon sila nakahalin sa talatapan kag 10:00 sa aga sang nagbalik liwat.
Agud indi na masulit ang hitabo, ginlantaw sang MSWDO kun ano ang kinahanglan nga kay-uhon sa ila nga building kag ginsiradhan na ang tanan nga buho nga posible lutsan sang Children In Conflict of the Law.#
