ILOILO– Magasugod na sa pagbyahe sa ruta nga Iloilo -Guimaras and vice-versa ang pila ka units sang Atlantis Yohan Express Corporation.
Suno kay Florencio Hervias, spokesperson sang Local Government Unit sang Buenavista, Guimaras, iya ginpahayag nga santo sa ila naistoryahan ni Mr. Joel Retiza, Operations manager sang Atlantis Yohan Express Corporation, magaabot ang MV Yohan Cruiser nagikan sa Surigao, sa Domingo sang aga, Agusto 18 kag gilayon ini nga magabyahe sa ruta nga Iloilo-Buenavista, Guimaras and vice-versa.
Magluwas sa MV Yohan Cruiser, magaabot man ang MV Yohan Blue sa diin magabulos-bulos sa pagbyahe ang duha ka barko.
Samtang, may isa man ka unit nga MV Yohan Green nga magabyahe naman sa ruta nga Iloilo-Jordan, Guimaras and vice-versa.
Ang mga barko magadungka sa Fort San Pedro kag magakarga lamang sang pasahero kag mga cargo. Sarang ini nga magkarga sang 300 ka mga tawo.
Ini nga mga barko ang magabyahe umpisa alas-6 sa aga tubtob alas-8 sa gab-i kag magaserbi nga alternatibo para sa mga pasahero nga nagatabok sa Iloilo kag Guimaras ilabi na nga alas-6 sa aga tubtob alas-6 sa gab-i lang ang byahe sang mga pumpboats kag ginapauntat pa sa pagbyahe ano man nga oras kun maglain ang tiempo.
