ILOILO CITY- Narumpag ang approach sang taytay sa Sitio Datu Sumakwel, Brgy. Malandog, Hamtic, Antique.
Sa interview sang Bombo Radyo kay Brgy. Kagawad Aprol Estolano sang Brgy. Malandog, iya ginpahayag nga sang nalumpag ang Malandog Bridge, natabuan gid nga naglabay ang motorsiklo nga may sakay nga duha ka tawo gani nahulog gid ang mga ini apang maswerte nga wala man nakaangkon sang dako nga samad sa lawas.
Suno kay Estolano, madugay na ang amo nga taytay bangud sang 2004 pa ini gintukod, kag sa pagkamatuod, base sa iya obserbasyon, daw mahuyang na gid man ini kag tuktukon.
Posible man nga resulta ini sang pag-ab-ab sang tubig sa idalom sang portion sang karsada bangud malapit man ini sa dagat.
Dugang ni Estolano, gin-check naman ini sadto sang municipal engineer apang wala man ini natigayon nga ma-rehabilitate.
Plano naman sang barangay nga maghimo na lang anay sang temporaryo nga taytay nga human sa kawayan agud makatabok ang mga pumuluyo.
