Indi husto nga i-dungan sa pandemya ang pagpangutang sang tuman ka daku nga kantidad.
Ini ang ginapanindugan ni Iloilo City Councilor Ed Peñaredondo may kaangtanan sa P1.75 billion nga i-loan sang syudad sang Iloilo gikan sa Development Bank of the Philippines (DBP).
Sa interview sang Bombo Radyo kay Peñaredondo, iya ginpahayag nga subong nga may pandemya, kun wala man nagsarurot, naghinay ang dalagan sang ekonomiya kag nagasuprer ang halos tanan.
Suno kay Peñaredondo, mangin madulom ang palaabuton sang syudad sang Iloilo kun iduso gid ang plano sa loan agreement.
Kun pahat-pahaton ang kadtuan sang loan santo sa inisyal nga ginplastar ni Iloilo City Mayor Jerry Treñas, ini amo ang masunod:
- Rehabilitation sang Jaro Big Public Market – P395 million
- Rehabilitation sang Arevalo Public Market – P150 million
- Rehabilitation sang La Paz Market – P395 million
- Pagtukod sang ospital lakip na ang site development – P500 million
- Pagbakal sang medical equipment, furnitures, kag fixtures – P100 million
- Pagtukod sang 8-storey parking building – P210 million
15 ka tuig ang amortization period sang amo nga loan.
Magluwas sa ginapangatubang nga pandemya, ginpahayag pa sang konsehal nga may iban pa nga mga utang nga dapat bayaran.
Una naman nagpanindugan si Iloilo City Mayor Jerry Treñas nga indi man mag-loan ang syudad kun indi ini makasarang magbayad.
Ang nasambit nga kantidad sang loan ang ginatun-an pa dugang sang Iloilo City Council.
