Husto kag bastante nga impormasyon ang ginakinahanglan sang mga tawo agud makumbinse nga magpabakuna batok sa COVID-19.
Ini amo man ang ginatinguhaan nga himuon sang mga opisyal kag health authorities sa Ohio, U.S.A samtang amat-amat na nga ginalikop ang estado para sa vaccination.
Suno kay Bombo International Correspondent Mary Drake direkta sa Ohio, U.S.A., bakuna sang Moderna kag Pfizer-BioNTech ang ginagamit sa Ohio.
Suno kay Drake, mismo ang mga hospital management top officials ang nagapresentar nga mag-una sa pagpabakuna agud maengganyo ang iban nga health frontliners nga mag-avail man sang dose.
Bilang isa man ka nurse sa rehalibitation center sa Ohio, gin-ako ni Drake nga sang una, may mga pagpangduha-duha man siya sa bakuna nga gina-administer bangud sa posible halit nga dala sang doses.
Kaangay niya, may iban man nga nagapamatok sa bakuna bangud sa ila religious beliefs; samtang may iban naman nga wala gid nagaavail sang bisan ano nga bakuna halin sang una.
Apang ginpahayag ni Drake nga ang pagtuon kag paghibalo sang mga impormasyon sa vaccination ang nakabulig sa iya — rason nga amat-amat naman siya nga nagakakumbinse nga magsuporta sa mass vaccination program.
Sa subong, 297,000 ka doses na sang bakuna ang na-administer sa Ohio.
Ang Ohio amo ang ika-23 nga estado sa Estados Unidos sa may pinakamadasig nga transmission sang virus sa per-person basis.
Sa subong, masobra na sa 770,000 ka tawo sa amo nga estado ang infected sang coronavirus kag masobra 9,500 ang patay.
