ILOILO CITY – Wala ginakabig nga pagpanghangkat sang pamunu-an sang The Medical City Iloilo ang pagbaton sang Coronavirus Disease 2019 patients sa pihak sang diskriminasyon sa health workers.
Sa interview sang Bombo Radyo kay Dr. Felix Ray Villa, Chief Executive Officer sang The Medical City Iloilo, iya ginpahayag nga wala pa magtuhaw ang COVID-19 sa syudad, preparado na ang hospital management humalin sang bulan sang Enero.
Suno kay Villa, preparado naman ang health workers sa mangin reaksyon sang mga tawo batuk sa ila.
May yara sang silver lining sa pihak sang pagpakanubo sa health workers bangud madamo ang nagpabutyag sang pagkabalaka, pagdayaw kag pagpalangga sa ila.
Ginapaidalom man sa Covid testing ang mga frontline workers sa diin apisar nga nagnegatibo ukon wala sang sintomas, sila ang ginapaidalom sa forced quarantine.
Ang mga frontline workers nga nagatatap sa mga COVID-19 positive ang may yara sang tatlo ka grupo kag kada semana, lain-lain ang frontline workers nga nagatrabaho.
Kahapon, Abril 12, nakaguwa na sa hospital ang ika duha nga COVID-19 patient sa nasambit nga hospital.
