Agi lang ang ayuda nga ginahatag sa mga driver sa tion nga nagatimbuok ang presyo sang gatong.
Ini ang panan-aw ni Mr. Raymundo “Boyet” Parcon, chairman sang Western Visayas Transport Cooperative, sa ikaduha nga hugnat sang distribution sang fuel subsidy para sa mga public utility jeepney (PUJ) drivers kag operators sa Iloilo City.
Sa interview sang Bombo Radyo kay Parcon, iya ginpahayag nga nagapasalamat sila sa amo nga bulig bangud daku na ini nga bulig para sa ila byahe, apang ginakabig nila ini nga band-aid solution.
Suno kay Parcon, kun mahatagan man sila sang coupon para sa libre nga gatong subong nga semana, maligaran naman sang pila ka bulan antes sila makabaton sang bulig apisar nga nagapanglakaak na ang presyo sang produktong-petrolyo.
Ginpahayag sini nga ang long-term solution nga ginalantaw nila sa ila grupo amo ang pag-aprubar kuntani sa ginaduso nga pagpasaka sang plete.
“Ginaayo namon nga pasakaan tani ang plete. Bisan magsaka man ang diesel naton, makabawi-bawi kami, ikumpara sa mga subsidy nga agi lang. Example, abtan ka abi subong nga August, December ka naman maabtan. Okay lang kun mag-abot, pero naagyan man namon nga ang iban nga upod nga naubusan sang pondo,” suno kay Parcon.
Pahayag pa sini, indi mapaktan kun san-o matapos ang ginamo sa Middle East, kag bangud net importer sang langis ang Pilipinas, apektado gid ang presyo sang fuel products sa pungsod kun may mga development sa amo nga parte sang rehiyon.
“Basi next week may rollback, pero pagka-another week, masaka naman ang diesel,” suno kay Parcon. “Tani i-approve man nila bisan piso lang ukon duha ka piso [nga saka sa plete].”
Nauna na nga ginpahayag sang Department of Transportation (DOTr) nga sa tunga sang oil price hikes kag inflation, suspendido gihapon ang fare hike sa tanan nga PUVs.
Ginapanindugan ni Transportation Secretary Giovanni Lopez nga indi dapat pag-ipapas-an sa mga pumuluyo kag commuters ang amo sini nga problema.
Nahibaluan nga subong nga adlaw, ginpatigayon sang Iloilo City Government ang second tranche sang distribution sang fuel subsidy para sa drivers kag operators sang jeep.
Sa kabug-usan, 1,049 ka PUJ units ang nag-apply kag nag-qualify para sa fuel subsidy. Sa sini nga numero, 877 ka units nga nagpasakop sa Local Public Transport Route Plan (LPTRP) ang makabaton sang P1,500 nga fuel subsidy samtang 172 ka unconsolidated units ang nakabaton naman sang P1,000 nga fuel subsidy.
Patigayunon sa Agosto 8-9 ang pagpatughong santo sa oras kag assigned gasoline station nga nakabutang sa fuel coupon.
