May mga nursery ang tagsa ka distrito sa probinsya sang Iloilo para sa mas ginapasangkad nga tree planting activity.
Base sa record sang Provincial Environment and Natural Resources Office, yari ang 5 ka satellite nurseries sa probinsya:
First District – Guimbal
Second District – Alimodian
Third District – Calinog
Fourth District – Dingle
Fifth District – Ajuy
May yara man sang central nursery ang probinsya nga nahamtang sa Barangay Daja, Maasin.
Sa interview sang Bombo Radyo kay Mitzie Peñaflorida, senior environmental management specialist sang Provincial Environment and Natural Resources Office, iya ginpahayag nga indi lang para sa picture taking ang pagtanum sang mga seedlings sa probinsya sang Iloilo.
Gina-id-idan ini sang monitoring team suno kay Peñaflorida kag gina-isip kun pila ang mabuhi kag pila ang mapatay.
Mas ginaengganyo man subong ang mga komunidad nga magbutang sang kaugalingon nga mga nurseries para sa pagpatubo kag propagation sang mga seedlings.
11 million na ang natanum nga seedlings sa probinsya humalin sang tuig 2011 apang 5 milyon lang ang nagtaas na.
Sa bulig sang Tanum Iloilo nga ginlunsar sang Setyembre 26, ginalauman nga mapauswag pa ang conservation, protection kag preservation sang palibot kag agud mabatuan ang epekto sang climate change.
Target sang Tanum Iloilo program nga makapatubo sang 1.5 million nga native kag fruit-bearing trees sa probinsya kada tuig.
