Ginalauman ang madasig nga trial batok sa kaso sang makangilidlis nga pagluthang-patay sang pulis nga si Jonel Nuezca sa iya kasilingan nga mag-iloy sa Paniqui, Tarlac.
Matandaan nga natabo ang insidente sang Disyembre 20 sang nagligad nga tuig kun sa diin ginbawian sang kabuhi sanday Sonya kag anak nga si Frank Anthony Gregorio.
Kapin duha ka bulan matapos ang insidente, gin-umpisahan na ang hearing sa kaso.
Ang una nga nag-testify sa korte amo si Florentino Gregorio nga amo ang bana ni Sonya kag amay ni Frank Anthony.
Sa una nga hearing, present man ang suspek nga pulis nga si Nuezca apang ginpaagi lamang sa Zoom.
Sa amo nga hearing, danyos pa lang ang naistoryahan apang suno kay Florentino, indi bastante ang anuman kadaku nga balor sang kwarta agud bayluhan ang kabuhi sang iya napatay nga mag-iloy.
Ginpahayag ni Florentino nga sa Pebrero 20 ang masunod nga hearing kag ang masunod nga magatestigo amo man ang ila himata nga nagkuha sa video sa amo nga krimen.
Matandaan nga nangin viral ang amo nga video antes ang Paskwa sang 2020, nakit-an ang pagpinuisay bangud sa boga kag ang aktwal nga pagluthang ni Nuezca sa mga biktima.
Two counts of murder ang ginapangatubang ni Nuezca bangud sa amo nga krimen.
