Balabagan sang U.S. Navy ang mga barko nga nagalabay sa Strait of Hormuz.
Gin-anunsyo ini ni US President Donald Trump matapos napaslawan ang Iran kag ang Estados Unidos sang Amerika nga makalab-ot sang kasugtanan kadungan sang ila dayalogo sa Pakistan.
Suno kay Trump, magahulag gilayon ang ila Navy agud himuon ang pagbalabag.
Sa iya man nga post, gin-akusaran ni Trump ang Iran sang “extortion” ukon pagpangwarta sa mga barko nga nagalabay sa amo nga Strait.
Ginsiling man ni Trump nga pangkuhaon sang US ang mga bomba nga gintanum sang Iran sa amo nga alagyan sang mga barko.
“Effective immediately, the United States Navy, the Finest in the World, will begin the process of BLOCKADING any and all Ships trying to enter, or leave, the Strait of Hormuz,” suno kay Trump sa iya post sa social media platform nga Truth Social. “The Blockade will begin shortly. Other Countries will be involved with this Blockade. Iran will not be allowed to profit off this Illegal Act of EXTORTION.”
Nagsabat naman ang Iranian Revolutionary Guards nga kontrolado gihapon sang Iranian security forces ang Strait of Hormuz.
Nagpaandam man ini nga ma-trap ang ila kasumpong sa amo nga area pananglitan may miskalkulasyon nga matabo.
“All traffic… is under the full control of the armed forces,” suno sa Guards naval command. “The enemy will become trapped in a deadly vortex in the Strait if it makes the wrong move.”
Nauna na nga gin-anunsyo ni US Vice President JD Vance kahapon nga napaslawan ang U.S. kag Iran nga makalab-ot sa kasugtanan kadungan sang ila dayalogo sa Pakistan.
Bangud sini, nagbiya na ang negotiating team sa Pakistan nga wala sang pinal nga hinambalan.
Ini ang maragtason kag ang highest-level direct engagement kuntani sa tunga sang US kag Iran sa sulod sang pila ka mga dekada.#
