Pareho nga nagnubo ang trust kag performance ratings nanday President Ferdinand “Bongbong” Marcos, Jr. kag Vice President Sara Duterte sa ikatatlo nga quarter sang 2023 kun basehan ang pinakaulihi nga Tugon ng Masa Survey nga ginpaguwa sang Octa Research.
Suno sa research firm, nabuhinan sang otso puntos ang trust rating ni Duterte halin sa 83% sa second quarter panubo sa 75% sa ikatatlo nga quarter samtang dose puntos naman ang ginbuhin sa satisfaction rating sini halin sa 82% pakadto sa 70%.
Photo: Reuters
Sa bahin sang trust rating sang presidente, halin sa 75% sa second quarter, nagsarurot ini sa 73%; samtang sa iya nga approval rating, yara na lamang ini sa 65% sa ulihi nga survey halin sa 71% sang Hulyo.
Nasaad nga nakuha ni Marcos ang iya pinakamanubo nga trust ranking nga 66% halin sa National Capital Region, samtang si Duterte naman ang nakaangkon sang iya lowest trust score nga 64% halin sa Balanced Luzon.
Ini nga survey ang ginpatigayon halin sang Septyembre 30 tubtub sa Oktubre 4 kag ginpasakupan sang 1,200 respondents kag may margin of error nga ±3%.
Sa sini nga 2023, pareho sanday Duterte kag Marcos nga may “downward trend” sa ila nga trust and approval ratings kun basehan ang survey results sang nasambit nga research group.
Matandaan nga sang temprano nga bahin sang Oktubre, nagpaguwa man ang Pulse Asia sang resulta sang ila nga third quarter survey kun sa diin duha ka digits gid ang gin-nubo sang approval numbers nanday Marcos kag Duterte halin sa second quarter sang 2023. #
