ILOILO CITY – Indi mapanas ang yuhom sa nawong sang Ilonggo nga nagpanguna sa Special Professional Licensure Examination for Secondary Teachers.
Ini matapos gin-release sang Professional Regulation Commission kag Board for Professional Teachers ang resulta sang pasinawan kun sa diin 200 lang sang mga secondary teachers sa kabug-usan nga 591 examinees ukon 33.84% ang nakapasar.
Sa interview sang Bombo Radyo kay Freddie Baldago Tanlawan Jr., nga tumandok sang banwa sang Carles, kag nagatrabaho bilang Managament Specialist sa sulod sang 15 ka tuig sa Riyadh, Saudi Arabia, iya ginpahayag nga ginsakripisyo gid niya ang iya tulog agud makuha ang rank1 rating sa pasinawan.
Si Tanlawan ang nagkuha sang pasinawan sa Philippine Embassy to Riyadh sang Abril 22, 2023.
Suno kay Tanlawan, handom kag dumot niya ang mangin manunudlo bangud nakit-an niya ang potensyal sa pagtudlo apisar napaslawan nga ipadayunon ang kurso nga ginkuha.
Nahibaluan nga kurso nga Bachelor of Arts in Political Science sa University of the Philippines – Miag-ao ang una nga kurso ni Tanlawan, apang bangud sa ginasuprer nga balatian, ginpakamaayo sini nga magkuha nalang sang kurso nga Bachelor of Science in Electrical Engineering sa Capiz State University agud mas matatapan sang iya pamilya.
Sang natabo nga pandemya sang 2020,didto na napinsaran ni Tanlawan nga magkuha sang education units sa University of the Philippines Open University agud makakuha sang board exam.
Dako ang pagpati ni Tanlawan sa ‘power of manifestation’ kag sa kabubut-on sang Diyos nga nangin rason sang iya kadalag-an kag malab-ot ang madugay na niya nga handom nga mangin manunudlo.
