Gin-updan sang militar ang paglubong sa isa ka Olympian marathon runner nga napatay sang una nga semana nga Septyembre matapos ginsunog sang iya ex-boyfriend.
Ginpatigayon ang military funeral kay Rebecca Cheptegei, 33, sa district of Bukwo nga malapit na sa border sang pungsod sa Kenya.
Daku ang papel sang militar sa lubong bangud isa anay ka sergeant ang biktima sa Uganda Peoples’ Defence Forces rason nga ginhatagan ini sang “gun salute” kadungan sang pagdul-ong sa iya sa katapusan niya nga palahuwayan.
Magluwas diri, linibo ang nagtambong sa lubong nga ginalakipan sang mga atleta, himata, kag iya mga abyan.
Kilala si Cheptegei nga nagpang-44 anay sa women’s marathon nga iya ginpasakupan sa Paris Summer Games sang nagligad gid lamang nga bulan.
Natabo ang krimen sa balay sini sa western Trans Nzoia County sa Kenya.
Ginpahayag nga nagkadto sa ila balay ang iya anay boyfriend nga si Dickson Ndiema nga may dala nga gasolina. Base sa report sang pulis, may nabatian pa nga singgitan ang mga kasilingan bangud sa away sa duta antes ginbubuan sang suspek sang gasolina ang lawas sang babaye kag ginsunog.
Bangud sa pagkarab-karab sang iya lawas, halos 80% gid ang nasunog kag sini lang nga Myerkules, ginkumpirma sang ospital nga nagsuprer ang biktima sang multi-organ failure nga rason nga ginbawian gid ini sang kabuhi.
Ang suspek naman nga nakaangkon man sang sunog sa 30% nga parte sang iya lawas kag gindala man sa ospital sa syudad sang Eldoret.
Ikatatlo na si Cheptegei nga elite female athlete nga ginpatay sa Kenya sa sulod lamang sang tatlo ka tuig.
Sang 2021, ginpatay man ang isa ka 25-anyos nga Olympic runner sa iya balay kun sa diin ginhatok-hatok ini sang buno sa iya liog. Ang iya bana ang ginpasakaan sang kaso nga murder.
Pila ka bulan lang ang nagligad, isa pa ka 28-anyos nga Kenyan athlete ang nasapwan-patay man sa iya balay, ginapatihan nga ginkuga, kag ang iya boyfriend man ang main suspect.
Base sa latest figures sa Kenya National Bureau of Statistics nga nabalhag sang January 2023, nakabutang nga 34 percent sang mga babaye sa amo nga pungsod ang naga-eksperyensya sang physical violence halin sa edad nga 15-anyos.#
