Maabtik nga ginpasibangod sang Russia sa Ukraine ang pagpatibusok sa isa ka military transport plane nga may sakay nga Ukrainian prisoners of war.
Natabo ang insidente sa southern region sang Belgorod kun sa diin sandig sa kumpirmasyon sang Russian ministry of defence, patay gid ang tanan nga sakay lakip ang 65 ka mga preso nga amo kuntani ang i-swap sa Ukraine, anum ka crew, kag tatlo ka Russian servicemen.
Suno pa sa Russia, nagpalupad ang Ukraine sang duha ka anti-craft missiles halin sa Lyptsi area south sang Ukrainian border nga amo ang rason sa pagtibusok sang Russian Ilyushin-76 military transport plane. Ini isa ka Soviet-era military transport aircraft nga gindesinyo agud nga makakarga sang mabug-at nga mga equipment.Wala sang direkta nga kumpirmasyon kag pagpanginwala halin sa Ukraine nga sila matuod ang nag-igu sa eroplano, apang halangpon ang ila statement nga amo naman ang nagabasol sa Russia bangud sa pagbutang sa risgo sa kabuhi sang prisoners of war.
Suno sa Ukrainian military intelligence, wala nagpaandam ukon nagpahibalo ang Russia nga dapat safe anay ang airspace sa Belgorod.
Una pa nga ginpahayag sang general staff nga karga sang eroplano ang missiles halin sa S-300 air defence systems sang Russia kag wala ini sang na-mensyonar nga may karga man ang eroplano nga mga prisoners of war.
Base pa sa statement sang Ukraine, responsibilidad kuntani sang Russia nga siguruhon ang safety sang mga prisoners sa idalom sang mga nakasugtan sang duha ka nasyon.
Ginpahayag naman sang Ukrainian Ministry of Defense, Coordination Headquarters for the Treatment of Prisoners of War kag Ukrainian Parliament Commissioner for Human Rights nga ginatipon pa subong kag gina-analisa ang tanan nga impormasyon. Nagpaandam man ini nga nagapadayon ang Russia sa information attacks sini batok sa Kyiv. #
