ILOILO CITY – Ginpanginwala ni Former Chairman sang Committee on Appropriations kag subong Liga President Dorothy Paez ang akusasyon sang pagpamulitika sa pagpasar sang budget sang probinsya sang Iloilo sang nagligad nga tuig.
Sa interview sang Bombo Radyo kay Paez, iya ginpahayag nga waala sang pagpamersonal nga ginhimo ang komitiba kundi ginsunod gid lamang ang mga rekomendasyon kag mga nakit-an sang Commission on Audit (COA).
Suno sa iya, bilang bag-o nga myembro sang 12th Sangunniang Panlalawigan sang nagligad nga tuig, wala siya sang panahon sa pagpamulitika kundi nagahimo lang sang nagakaigu nga konsultasyon kag pagsunod sa mga proseso sang COA.
Nakabulig ini suno kay Paez agud mabuligan ang Committee on Appropriations sa subong agud malantaw ang insakto nga proseso sa pagpasar sang tuigan nga budget sang probinsya.
Dugang niya, bilang Vice Chairman sang amo nga komitiba, handa siya nga magbulig sa Chairman nga si Board Member Domingo Oso agud mapadali ang paghikutar sang mga kinahanglanon kag malikawan ang anuman nga delay.
Iya ginpahayag nga may yara na siya sang kopya sang nasambit nga budget kag iya ini pagatun-an sang maayo.
Nahibaluan nga ang tuman ka late nga pagpasar sang budget ang ginakabig kabangdanan kon ngaa napaslawan ang Iloilo Provincial Government malakip sa ginpasidunggan sang Seal of Good Local Governance (SGLG) sang Department of Interior and Local Government subong nga tuig (DILG).
