Ginkumpirma ni Department of Justice Secretary Menardo Guevarra nga may urine samples ukon ihi nga nakuha ang National Bureau of Investigation (NBI) gikan sa lawas sang flight attendant nga si Christine Dacera.
Suno kay Guevarra, santo sa impormasyon nga ginpalab-ot sang NBI, nagdangat sa 100 milliliters sang urine ang natigayon nga ma-extract halin sa lawas sang nasambit nga 23-anyos nga flight attendant.
Ginalauman nga inadlaw lang ang hulaton antes mag-gwa ang resulta sang laboratory examination sa amo nga body fluid.
Nahibaluan nga tubtob subong, ginalikop sang kontrobersiya kag misteryo ang kamatayon ni Dacera matapos ginpahayag sang hanay sang mga pulis nga biktima siya sang pagpanghimulos-patay sa isa ka hotel sa Makati City sang Enero 1.
Ang mga abyan ni Christine nga yara sa Makati Hotel sa amo nga tion ang ginpangalanan bilang mga suspek, apang tubtob subong, hugot ang ila panindugan nga inosente sila.
Sa pihak nga bahin, wala naman naglaum ang NBI nga makakuha sila sang body fluid kay Christine apisar na-embalsamar na ang bangkay kag pila ka adlaw na nga nahamyang sang amo nga tion.
Suno kay Atty. Ferdinand Lavin, spokesperson sang NBI, daku ang mabulig sang ihi ni Dacera para sa ginapatigayon nga imbestigayon.
Subject ang urine sample sa laboratory screening kag confirmatory test agud mahibaluan kun may presensya sang alcohol, illegal drugs, ukon anuman nga substance kag ang level sini.
