Magaupdanay ang Estados Unidos sang Amerika, Japan, kag South Korea sa isa ka trilateral summit sa Agusto 18.
Ang summit ang ginalauman nga tambungan mismo ni US President Joe Biden, Japanese Prime Minister Fumio Kishida, kag South Korean President Yoon Suk Yeol sa Camp David presidential retreat sa Maryland malapit sa Washington.
Pananglitan madayon ang amo nga plano, ini amo ang mangin labing-una nga standalone summit sa tunga sang mga lider sang tatlo ka nasambit nga pungsod apisar nga may yara man sila anay sang trilateral meetings kadungan sang mga ginatambungan nga international conference kag mga okasyon.
Sa sunod nila nga pagkit-anay, ang ginalantaw nga mayor nga agenda amo ang pagsabat sa pagpamahog sang North Korea nga padayon sa pagpalupad sang ballistic missile.
Ginalantaw nga planuhan kun paano makakuha sang temprano nga impormasyon kun magpalupad sang missile ang North Korea.
Sa subong, ang Amerika ang may yara sang system nga naka-angot sa Tokyo kag Seoul agud ma-detect kag ma-track ang missiles sang Pyongyang; apang ang iban nila nga Asian security allies ang wala sang mekanismo agud gilayon nga masugid ang impormasyon sa isa kag isa. #
