Naggamit ang Estados Unidos sang Amerika sang tatlo ka C130 military planes agud nga i-parachute ang masobra 38,000 ka putos nga mga pagkaon kag ayuda para sa mga tawo sa Gaza.
Suno sa U.S. Central Command, ini nga operasyon ang ginpatigayon kaupod ang Royal Jordanian Air Force.
Ini man ang labing-una nga tion nga nagpatigayon ang Amerika sang airdrop sang pagkaon nga una naman nga ginhimo sang Jordan, United Kingdom, Egypt, kag France.
Suno sa White House, padayunon ini nga tikang kag suportado ini sang Israel.
Magluwas diri, ginakonsiderar man sang Biden administration nga magpadala sang ayuda apang ipa-agi sa mga barko halin sa Cyprus.
Ini ang una nga bulig nga napadala sang US halin sang natabo ang ginapahayag “massacre” sang nagligad nga adlaw kun sa diin masobra 100 ang patay kag masobra 700 ang pilason bangud gin-alegar nagpinalupok ang militar sang Israel sang nagpalapit ang mga tawo sa mga truck sa Gaza City agud kuntani magpangayo sang pagkaon.
Una na nga ginpahayag sang United Nations Office for the Coordination of Humanitarian Affairs nga one-fourth sang populasyon sa Gaza ukon 576,000 ka mga tawo ang nagasuprer sang tuman na gid nga kagutom.
Suno naman sa Health ministry sang Gaza, masobra na sa 30,000 ka mga tawo — lakip ang 21,000 ka mga babayi kag kabataan — ang napatay halin sang natabo ang Israel-Hamas war sang Oktubre 2023.#
(Photo: The Times of Israel)
