Ginpakigbahin ni Palace Press Officer Usec. Claire Castro nga preparado ang mga kapulisan sa pagahiwatun nga mga hublag-protesta sa Setyembre 21.
May kaangtanan ini sa anibersaryo sang Martial Law nga gindeklarar sang nagligad nga 1972 sa idalom sang diktador nga si late President Ferdinand Marcos Sr.
Madumduman nga sang nagligad nga tuig, nagluntad ang komosyon sa tunga sang rally kun sa diin ginbawian sang kabuhi ang isa ka indibidwal, samtang 76 naman ang mga pilason.
Ginpakigbahin man ni Castro nga wala sang plano nga punggan ni President Ferdinand Marcos Jr., ang mangin lihok sang publiko sa nasambit nga pagtilipon.
“Karapatan niyo po ang magsalita. Karapatan niyo po ang manawagan. Huwag na lang po sanang maging marahas,” suno kay Castro.
Dugang pa niya, nagapamati gid ang presidente sa panawagan sang publiko.
