Ginpangitaan pa gid sang dugang nga paagi agud madul-ong sa mga residente sa Barangay Calumpang, Molo, Iloilo City ang mga impormasyon may kaangtanan sa pagpabakuna batok sa COVID-19.
Ini ang may kaangtanan gihapon sang kampanya sa COVID-19 vaccine literacy kag agud mapanas na ang mga pagpangduha-duha sang mga tawo sa vaccines.
Sa interview sang Bombo Radyo kay Punong Barangay Roberto Niño, iya ginpahayag nga bangud daku nga barangay ang Calumpang, ginpang-cluster ang mga zona kag ginbutangan sang cluster head nga amo ang nagapanguna para sa kampanya.
May mga health workers kag day care workers man nga nagapamalay-balay agud makaistorya sa mga tawo.
May mga fliers man nga ibutang sa Barangay Emergency Operations Center kag ipanagtag sa diin ini ang nagaunod sang mga sabat sa mga masami nga pamangkot sang mga tawo may kaangtanan sa bakuna.
21,000 ang mga pumuluyo sang Calumpang kag nagalaum si Niño nga paagi sa pagbinuligay, mas mapasangkad man ang kampanya bilang suporta sa mass vaccination program.
