Ginpanugyanan sang isa ka constitutional law expert ang kampo ni Vice President Sara Duterte nga magpakita sang mga ebidensiya agud baliskadon ang mga akusasyon nga nakasaad sa Articles of Impeachment kag indi lamang magsalig sa blanket denial ukon pangkabilugan nga pagpanginwala sa mga akusasyon.
Ang pahayag ang kasunod sang pagsumiter sang legal team ni Duterte sang ila nga Answer sa Articles of Impeachment sa Office of the Senate Secretary sang Lunes.
Sa ila nga ginpasa nga sabat, ginhingyo sang kampo sang bise presidente na ibasura ang impeachment complaint bangud suno sa ila, may mga depekto ini sa konstitusyonalidad, proseso, kag kaundan.
Sa interview sang Bombo Radyo kay Atty. Michael Yusingco, isa ka constitutional law expert, iya ginpahayag nga importante nga masabat sang depensa ang mga partikular nga alegasyon paagi sa mga dokumento, rekord, kag iban pa nga ebidensiya nga mahimo nga magpahina sa mga akusasyon sang prosekusyon.
Suno sa iya, bisan kabahin sang legal nga estratehiya ang pagkontra sa legalidad sang impeachment complaint, mas mangin mapag-on ang depensa kun makapakita ini sang kongkreto nga ebidensiya nga magasuporta sa ila nga mga argumento.
Sa pihak sang hingyo nga mabasura ang Articles of Impeachment, ginsiling naman sang abogado ni Duterte nga handa ang bise presidente nga mag-atubang sa impeachment trial kun kinahanglanon.
