Wala sang nakit-an ang Department of Energy nga may sabotahe nga natabo nga nagtuga sang pagpalpak sang pila ka power plants sa pungsod sa tunga pa sang mainit nga tyempo.
Suno kay Energy Assistant Secretary Mario Marasigan, ang mga insidente nga nag-apekto sa operasyon sang mga planta ang tuga lamang sang mataas nga demand sa kuryente. Kun mataas ang demand suno sa iya, nagaka-stress ang system nga rason sang wala ginalauman nga mga problema.
Suno pa kay Marasigan, nagpadala man sang reports kag mga ebidensya ang mga planta kaangot sa nasablag nga mga operasyon kag internal nga mga problema.
Kumbinsido ang ahensya suno sa iya nga internal problems ang natabo kaangay sang paglupok sang boiler tubes kag kinahanglan pa nga kay-uhon agud maka-online liwat kag makabalik sa full capacity.
Dugang sini, wala subong sang na-forecast nga yellow kag red alerts sa power grid sa pungsod bangud nakit-an nga normal condition pa ang suplay sang elektrsidad.
Matandaan nga sang nagligad nga semana, ginabulos-bulos lang ang pagbatak kag pagbawi sang red kag yellow alert status sa grid sa Luzon kag Visayas.
