ILOILO – Arestado ang walo ka mga persona bangud sa ginapahayag pagpatigayon sang ilegal nga pagpangisda sa kalalawran nga sakop sang Concepcion, Iloilo.
Ang mga suspetsado ang lunsay residente sang Carles, Iloilo.
Sa interview sang Bombo Radyo kay Concepcion Mayor Raul Bañas, iya ginpahayag nga nagtinghuwa pa kun tani nga malagyo ang isa ka bangka apang gilayon nila ini nga nadakpan.
Suno kay Bañas, narekober sa bangka sang mga suspetsado ang mga parapernalya nga ginagamit sa pagpatigayon sang Dynamite Fishing lakip man ang mga dinamita kag ginabanta sa 60 ka kilo ang isda nga nadakop paagi sa dinamita.
Dugang sang natungdan, base sa pag eksamina sang Bureau of Fisheries and Aquatic Resources kumpirmado nga biktima sang dinamit ang mga isda.
Ginpahayag ni Bañas, nagakasubo sila bangud sa pihak sang aktibo nila nga kampanya batok sa pagpatigayon sang ilegal nga pagpangisda sa Visayan Sea may yara sa gihapon nga nagakaladakpan.
Sa subong yara na sa preso na sa Concepcion Municipal Police Station ang mga suspetsado kag mahimo lang nga makagwa kun magbayad sang piyansa.
Samtang kumpiskado naman ang mga isda nga ila nadakop kag na impound ang ila mga bangka lakip na ang ila mga dinamita.
Nakatalana naman nga makig kita si Bañas sa alkalde sang Carles agud istoryahan ang natuhoy sa mga residente nila nga nagkaladakpan.
