Nagasingkal pa ang sitwasyon sa Maui, Hawaii, indi bangud sa padayon nga paglamon sang kalayo — kundi bangud sa kaakig sa mga tawo kun ngaa kulang ang warning nga ginhatag sa ila antes ang wildfires.
Subong nga nagsaka na sa 99 ang mga patay sa Lahaina sa isla sang Maui, ini na ang ginakabig pinaka-makamamatay nga wildfire sa Amerika sa sulod sang isa ka siglo nga lapaw pa sa 85 nga napatay sang 2018 sa Butte County sa Northern California.
Suno kay Bombo Jerry Saludez, international correspondent sa Hawaii, nagabinasulay na ang mga tawo kun ngaa wala nagtunog kag wala na-activate ang warning sirens antes naglapta ang kalayo.
Nahibaluan nga may 400 ka alarms sa amo nga estado kag amo ang ginakabig pinakadaku nga warning system sa kalibutan, apang suno sa Hawaii Emergency Management Agency, matinong ang mga sirena sang tion nga naglamon ang kalayo.
Pila sa mga residente ang nagsiling nga nahibaluan lang nila nga may sunog sang malapit na ang kalayo sa ila nga balay kag nagasininggit na ang mga residente.
May ginlunsar na subong nga imbestigasyon agud malantaw kun paano nag-responde ang otoridad sa lapnagon nga sunog.
Ginalantaw man nga labi pa nga magsaka ang numero sang mga patay bangud sa ginabanta 1,000 nga missing nga padayon pa ginapangita.
