Wala pa sang kapat-uran kun mangin bastante ang suporta sang mga Republicans sa ginaduso nga pagpa-impeach kay U.S. President Donald Trump pila ka adlaw antes pormal nga matapos ang iya termino bilang presidente sang pungsod.
Suno kay Bombo International Correspondent Sonia Provido Short direkta sa Mississippi, USA, lain-lain man nga opinyon ang nagagwa halin sa mga mangin-alamon sa Estados Unidos.
Bwas, Lunes nga adlaw, may iga-introduce nga articles of impeachment ang Democratic members sang House of Representatives.
Ang ginaduso nga impeachment ang kasunod sang pag-engganyo ni Trump sa iya nga mga supporters nga magpadulong sa U.S. Capitol sang nagligad nga Enero 8 agud pamatukan ang pag-certify sang Kongreso sa pagdaug ni US President-Elect Joe Biden.
Ang kuntani peaceful rally nga patigayunon ang nagresulta sa isa ka riot kun sa diin nangin bayolente ang mga tawo kag narekord ang apat ka mga patay bangud sa aktibidad.
Suno naman kay Short, wala pa sang kasiguraduhan kun ano ang mangin akto sang Republicans kasunod sang pagpaninguha sang mga Democrats nga pahalinon si Trump.
May mga Republican lawmakers nga nagpahayag nga dapat na manaog sa pwesto si Trump; samtang may iban naman nga high-ranking administration officials nga wala nagasuporta sa panawagan sang mga pumuluyo.
Ginpahayag man sang iban nga ang pag-impeach kay Trump apisar masobra isa ka semana na lang ang nabilin sa iya termino ang makatuga lang sang pagtunga sa Estados Unidos.
May nagasiling man nga nahadlok lang ang mga Democrats kun ano pa ang masarangan nga mahimo ni Trump sa masobra isa ka semana nga nabilin sa iya nga termino.
“We’re hopeful and prayerful nga mangin matalunsay ang transition of power”
Bilang isa man ka US Citizen, nagalaum kag nagapangamuyo man si Short nga matapos na ang kinagamo sa Estados Unidos.
Vocal si Short sang iya suporta kay President Trump kag sa pagkamatuod suno sa iya, kun nahatagan sang kahigayunan, magapasakop man siya sa peaceful protest batok sa certification sang pagdaog ni Biden bangud suno sa iya, may mga ebidensya pa nga dapat lantawon agud mapamatud-an nga may dayaay nga natabo sa eleksyon.
Apang gin-athag ni Short nga suportado niya ang protesta apang maathag nga sala ang riot.
Sa subong, ginalauman nga madayon ang malinong nga transition sang power sa Biden Administration nga amo man ang una nga ginpromisa ni President Trump sa iya nga tweet.
