Ginkumpirma sang World Health Organization (WHO) ang lima ka positibo nga kaso sang hantavirus nga may kaangtanan sa mga kamatayon nga na-rekord sa isa ka cruise ship sa Atlantic Ocean.
May tatlo pa gid ka kaso nga ginadudahan nga may koneksyon sa Andes strain sang hantavirus.
Suno sa amo nga health agency sang United Nations, posible nga may madugang pa nga kaso, apang nagapabilin nga manubo ang peligro nga dala sini sa public health.
Suno kay WHO Chief Tedros Adhanom Ghebreyesus, ginpahibalo sila sang United Kingdom kaangot sa grupo sang mga pasahero nga may severe respiratory illness samtang nagasakay sa Hondius cruise ship nga may byahe halin sa Cape Verde pakadto sa isla sang Tenerife sa Spain.
Sa subong, walo na ka kaso ang na-report kun sa diin tatlo ang napatay, lima ang kumpirmado, kag tatlo ang suspected cases.
Ang una nga napatay sa barko amo ang isa ka lalaki nga nagpakita sang sintomas sang Abril 6 kag napatay pagkalipas sang lima ka adlaw. Wala siya nakuhaan sang sample kag wala dayon nakilala nga hantavirus bangud pareho ang sintomas sini sa iban nga virus.
Ang iya asawa amo ang ikaduha nga biktima. Nagpanaog siya sa Saint Helena, nagmasakit, kag napatay sang Abril 25.
Isa pa gid ka babayi ang nangin ikatatlo nga napatay matapos magpakita sang sintomas sang Abril 25 kag napatay pito ka adlaw ang nakaligad.
Suno kay Tedros, bangud ang incubation period sang hantavirus mahimo maglab-ot sa tubtob anom ka semana, posible nga may madugang pa gid nga mga kaso.
Antes nagsakay sa barko, ang una nga duha ka biktima nagbiyahe anay sa Chile, Argentina kag Uruguay para sa isa ka bird watching trip nga naglakip sang pagbisita sa mga lugar nga ginapuy-an sang mga ilaga nga kilala nga nagadala sang hantavirus. Ginaiimbestigaran sang mga awtoridad sa Argentina ang ila gin-agyan nga biyahe.
Pahayag pa ni Tedros, magapadala ang Argentina sang 2,500 diagnostic kits sa mga laboratoryo sa lima ka mga pungsod.
Ginpahibalo man sang WHO ang 12 ka mga pungsod nga may mga citizens nga nagpanaog sa Saint Helena. Lakip diri ang Canada, Denmark, Germany, Netherlands, New Zealand, Saint Kitts and Nevis, Singapore, Sweden, Switzerland, Türkiye kag ang United States.
Una naman nga gin-anunsyo sang Department of Health nga may 38 ka mga Pinoy crew members sa involved nga cruise ship apang lunsay sila nag-negatibo sa virus.
Nahibaluan nga ang hantavirus amo ang isa ka grupo sang virus nga ginadala sang mga ilaga kag iban pa nga rodents kag mahimo magresulta sang tuman nga sakit sa tawo. Mahimo ini makuha paagi sa pagdapat ukon contact sa infected nga ilaga, ila nga ihi, higko, ukon laway.
Ang strain sang hantavirus nga nakita sa Dutch-flagged cruise ship amo ang Andes virus.
Makita ini sa Latin America kag amo lamang nga hantavirus nga kilala nga mahimo nga mapasa halin sa isa ka tawo pakadto sa iban pa nga tawo ukon limited human-to-human transmission.
Sa nagligad nga mga outbreak, ang paglapta halin sa tawo pakadto sa tawo may koneksyon sa malawig kag malapit nga kontak sa sulod sang panimalay, intimate partners, kag healthcare workers.#
