Mas naglapad pa ang nahalitan sang wildfire nga nagakatabo subong sa Texas Panhandle sa Estados Unidos sang Amerika kag amo na ang ginakabig nga ikaduha sa pinakadaku nga sunog nga nagluntad sa bug-os nga maragtas sang amo nga estado.
Ang Texas Panhandle amo ang rehiyon sa Texas nga ginabug-usan sang 26 ka counties sa northern nga bahin sang state. Kaiping sini ang New Mexico sa west kag ang Oklahoma sa north kag east.
Sa lima ka major wildfires sa amo nga rehiyon, malapit na sa 900,000 ka ektarya ang nalamon sang kalayo nga rason sang pagbakwit sang mga tawo, ginpasirado ang mga dalan, kag gindeklarar na ang emerhensya.
Sa latest nga impormasyon, ang pinakadaku nga sunog amo ang sa Smokehouse Creek, north sang Amarillo, nga nakahalit na sa 850,000 ka ektarya kag tres porsyento pa lamang sini ang napalong.
Nagpaguwa naman si Texas Gov. Greg Abbott sang disaster declaration sa 60 ka counties kag ginhingyo man ang Texans nga limitahan ang mga aktibidad nga makabutang sa ila nga pamilya kag mga abyan sa risgo.
Ginakahangaw-an nga maglala pa ang sitwasyon bangud sa mabaskog nga huyop sang hangin, mataas nga temperatura kag laya nga mga hilamon nga amo pa ang rason kun ngaa madasig nga nagalapta ang kalayo.#
(Photo: NBC News)
