ILOILO CITY- Ginkalipay sang West Visayas State University ang pagsulod sang kilala nga scientist kag anay director sang Department of Science and Technology – Science Education Institute (DOST -SEI) nga si Dr. Josette T. Biyo, bilang bag-o nga faculty sa unibersidad.
Kabahin si Biyo sang College of Education – Graduate School para sa first semester sang academic year 2024-2025, kag magatudlo sang Advanced Marine Ecology para sa Doctor of Philosophy in Science Education program, Major in Biology.
Nahibaluan nga si Dr. Biyo ang isa ka ginapabugal nga scientist bangud nga nakabaton ini sang International Excellence in Teaching Award sa Intel International Science and Engineering Fair nga ginhiwat sa Kentucky, USA sang 2002 kag siya ang labing una nga manunudlo nga Asyano nga nakakuha sang amo nga pagkilala.
Labi nga nakilala si Biyo sang ginsunod sa iya nga apelyido ang asteroid nga 13241 Biyo ukon “Planet Biyo” nga nadiskubrehan sang 2003.
